No marco do proxecto de investigación D-Inclusión (código PID2021-123552OB-I00), iniciativa financiada polo Ministerio de Ciencia, Innovación e Universidades, a Axencia Estatal de Investigación e o Fondo Europeo de Desenvolvemento Rexional (MICIU/AEI /10.13039/501100011033 e FEDER, UE), a Universidade de Huelva impulsa a análise de experiencias formativas dirixidas a persoas maiores, co fin de avanzar na súa inclusión dixital.
Coordinado polos profesores Ramón Tirado e Ana Duarte, o proxecto ten como obxectivo identificar e validar metodoloxías pedagóxicas innovadoras que faciliten a adquisición de competencias dixitais esenciais, promovendo a autonomía, o benestar e a participación activa deste colectivo na sociedade dixital.
Nesta primeira fase, e en colaboración con Cruz Vermella Andalucía e a Asociación Somos Digital, iniciáronse os primeiros estudos de caso en distintas rexións do país, seleccionadas pola súa diversidade territorial e social. As primeiras experiencias desenvolvéronse en Isla Cristina (Huelva) e nos municipios galegos de Tordoia e Cabana de Bergantiños (A Coruña).
O primeiro estudo de caso tivo lugar o pasado 13 de xuño no Punto Vuela do barrio de El Rocío, en Isla Cristina, co obradoiro titulado “Intelixencia Artificial (IA) para maiores de 55 anos”. A sesión, dirixida pola dinamizadora local Juani Martín, introduciu ás persoas maiores participantes no uso da IA CARINA, nun entorno accesible e adaptado ás súas capacidades e intereses.
O segundo estudo de caso centrouse na iniciativa Enredando Tour, unha experiencia itinerante impulsada por Cruz Vermella Galicia e AMTEGA (Xunta de Galicia), celebrada os días 16 e 17 de xuño en Tordoia e Cabana de Bergantiños. Nesta iniciativa, unha furgoneta equipada con recursos tecnolóxicos ofreceu obradoiros prácticos sobre ciberseguridade, banca en liña, realidade virtual e asistentes de voz, guiados pola dinamizadora Noelia Iglesias, co apoio do voluntariado de Cruz Vermella.
Durante ambas actividades, o equipo investigador da Universidade de Huelva recompilou datos clave para o desenvolvemento de propostas didácticas inclusivas. Así mesmo, participou Javier López, membro do equipo de investigación e responsable autonómico do programa Click_A de Cruz Vermella Andalucía, unha iniciativa de voluntariado para a inclusión dixital financiada pola Axencia Dixital de Andalucía, que reforza o compromiso da entidade coa redución da fenda dixital.
Con esta iniciativa, a Universidade de Huelva reafirma o seu compromiso institucional coa transferencia de coñecemento, a investigación aplicada e a responsabilidade social, traballando en alianza con entidades do terceiro sector para dar resposta aos desafíos actuais en materia de inclusión dixital.
Agradecer a Javier López, responsable de Click_A, programa de Inclusión Dixital en Cruz Roja Andalucía, e ao profesorado da Universidade de Huelva que incluísen o proxecto Enredando.gal neste estudo, do que ben seguro poderemos extraer conclusións e melloras para próximos roteiros.
